Sinuri ng Department of Social Welfare and Development(DSWD) Field Office 1 at Regional Commission on Audit kamakailan ang nakatiwangwang na proyektong pabahay sa Brgy. Salingcob na bahagi ng Core Shelter Assistance Program noon pang 2012.
Sinabi ni Mayor Alicia Primicias-Enriquez na napansin na niya ang mga pabahay na ito bago pa man magkaroon ng site development at mula mismo sa kaniyang pakikipag-usap sa National Housing Authority, magiging magastos kung ayusin ang mga ito dahil naitayo na ang mga estruktura.
“Batay mismo sa obserbasyon ng Mines and Geosciences Bureau (MGB), may mga bahaging eroded na. Mananatiling prayoridad ng pamahalaang lokal ang kaligtasan at seguridad ng mga posibleng benepisyaryo ng proyektong ito,” saad ni Mayor Alice.
Binigyang-diin din ni Mun. Engr. Normandy Flores ang ‘primary concern’ sa mga naitayong estruktura, partikular na sa riprap, drainage system, at kakulangan ng pinagkukunan ng tubig.
Samantala, binanggit naman ng DSWD kay Mayor Alice na naghahanap sila ng lugar para pagtayuan ng Regional Stock Center na magagamit sa pag-iimbak ng food packs, hygiene, sleeping, at cooking kits, at maging ang MalasaKits.
Inirekomenda naman ng alkalde ang Regional Evacuation Center sa Sta. Maria West at iinspeksyunin pa kung maaari itong maging angkop na lugar para sa nasabing layunin.
Dumalo sa pagpupulong sina MSWD Officer Delia Dalutag, mga kinatawan ng DSWD FO 1 na sina Atty. III Arnila Geronimo, Frelamay Inabure (SWO I), Leah Mylene Laurecio (SWO V), at mula sa COA RO 1 sina Maria Cristina Poserio(RSA), Lilia Corpuz (SA IV), Rebecca Monid (SA II), Ammelaine Laudencia (SAE II), at Oscar Velasquez mula sa COA Sta Maria (SA II).
